Ikasleekin Durangoko Azokara joateko tradizio luzea dugu, aukera ezin hobea delako euskal kultura bertatik bertara ikusteko. Pandemiako urteen ostean, aurten berriro euskal kulturako plaza garrantzitsuenera itzuli gara. 2. Batxilergoko ikasleek goiz zoragarria pasatu dute Durangaldeko erdigunean.

Goizean goiz Durangoko alde zaharra bisitatu dugu, benetan baduelako zer ikusi: Santa Ana eliza eta bere aterpe berezia, fatxada margotu ikusgarria duen udaletxea, bonbardeaketaren aztarnak, Kurutziagako plaza, Ibaizabal ibaia bera…

Horren ostean Durangoko Azokara sartu gara. Bertan, euskal idazle eta musikariekin egoteko aukera izan dugu eta aurten argitaratu diren 930 nobedadeak ezagutu ahal izan dituzte. Euskal literatura eta musikan murgiltzeaz gain, badira beste aukera asko; aldizkariak, baliabide digitalak, jostailuak, arropa…  Eta giro ezin hobea egon da. Urteroko zita honek ez digu sekula huts egiten!!